سلامو عليكو
النهاردة انا هاكلمكم فى موضوع ظريف ولذيذ اسمة اتغديتى يا حكومة . وعلى فكرة الموضوع دة حقيقى مش خيال ولا فبركة سيما
اعرفكم بنفسى الاول . انا عندى سوبر ماركت ( طبعا هايجى واحد يقولى احنا مالنا عندك سوبر ماركت ولا عربية كشرى ) هاقول لة يا اخى هو انا باقول لك انت ؟
شوية ويطلع المشرف يقولى انت كدة بتعلن عن نشاطك فين حق الاداء العلنى ؟ هاقولة يا با العمدة انا ما قولتش اسم المحل اية ؟
المهم فى يوم من الايام جالى الاخ بتاع التأمينات وقالى برخامة ووش مكشم فين كشف مرتبات العاملين بالمحل ؟ وطبعا انا علشان راجل ماشى فى السليم قمت مطلع له ( الظرف اياة ) قصدى الكشف اياة قام مغير التون بتاع صوتة وركبلة نغمة جديدة حنينة الى جانب بسمة منورة فى وشة واخد الكشف وبص فية من باب برو العتب يعنى ما خلاص الجيب اتعمر
وفجأة اكتشفت مصيبة اية اللى انا نيلتة دة اتارينى اديتة الكشف الخصوصى مش العمومى طبعا هاتقولوا يعنى اية خصوصى ويعنى اية عمومى ؟ هاتعرفوا دلوقتى .
بصلى وقالى كلة تمام بس عايزك تندهلى الواد اللى اسمة ( حكومة ) اللى انت كاتبة فى اخر الكشف . طبعا اتلخبطت وعرقى بقى مرقى واضطريت انى اشخشخ جيبى تانى وارمى بياضى بعلبتين احمر وتانى رجعت النغمة الحنينة والابتسامة المنورة وقالى ماشى بس عايز اعرف هوه فية عامل عندك اسمة ( حكومة ) طيب اسمة حكومة اية ابوة اسمة اية يعنى ؟ ولية حاطط لة مرتب اكبر من مرتبك انت اصلا ؟
فقلت لة طالما سيادتك بقى ابتسمت وطلعت راجل طيب هاقولك مين هو المدعو ( حكومة )
حكومة يا سيادى ما هوش شخص واحد حكومة دة يجى خمسة ولا ستة انت ونصيبك بقى وكمان حسب نشاطك ؟
هز دماغة وقالى مش فاهم ؟ قلت لة المسألة بسيطة سعادتك شفت فيلم طباخ الريس ؟ قال ايوة . قلت لة طيب سعادتك شفت الطاجن بتاع الحى والطاجن بتاع الكهربا والطاجن بتاع الصحة ؟
بس وعنها وقام ضاحك وقالى اة وكمان الطاجن بتاع التأمينات ؟ قلت لة اسم الله عليك اديك فهمتها لوحدك . دى بقى يا سيادى رواتب شهرية بتندفع للناس دول علشان يحلوا عن نافوخى رغم انى والله العظيم ما فى عندى اى مخالفة لكن الامر ما يسلمش . لو ما دفعتش يجيلك بتاع الصحة ومالقاش حاجة غلط يقوم يمسك فيك ويقولك انت من شوية كان عندك زبون ضوافرة طويلة ويعملك محضر . ويجيلك بتاع الحى ويقولك عربيتك دى هاتقولة ما عنديش عربية يقوم عملك محضر ويقولك علشان لما تجيب عربية يبقالك عندنا محضر .
يجيلك بتاع شرطة الكهربا يلاقى كلة فى السليم بس ما فيش طاجن يبص للسقف ويقولك اةةةةةةة عندك 3 لمبات محروقين كان ممكن يسحبوا كهربا فى اليوم بجوز جنيهات فى 30 يوم يعنى 60 فى 12 شهر يعنى 720 جنية انت ضيعتهم على ادارة الكهربا ويقوم خابطك محضر .
عرفت لية بقى بنغدى الحكومة قبل ما تفطر وتتغدى وتتعشا بينا وتحلى باللى خلفونا
وسلم لى على طاجن ستك ويجعلة عامر
ليست هناك تعليقات:
إرسال تعليق